Farzana Naina

آغوش January 5, 2023

’’ آغوش ‘‘

تم اک شفاف سا دریا
کہ جس کی لہروں میں اب بھی
مرے بچپن کے منظر بہتے رہتے ہیں
کہ جس کی سبز کائی پر
کنول کے پھول اک امید پر ایسے ہمکتے ہیں
کہ جیسے ماضی کے لمحے دوبارہ لوٹ آئیں گے
بہت سے خواب آنکھوں کے
اُسی موسم کی غمخواری کو آتے ہیں
جہاں ہم تم دوپہروں کی عجب انمول چھاؤں میں
اناروں کی نئی کلیوں سا چٹکے تھے
حسین و دلنشیں، شفقت بھرے پیکر
ہمیں اپنی نگاہوں کے تحفظ میں لیئے رہتے
وہ کیسے مرگئے جن کے ستارے منزلوں تک ہیں
کہاں وہ چل دیئے کہ جن کے دَم سے شمعیں جلتی ہیں
کسی بھی دستِ شفقت کا کوئی لمحہ نہیں بھولا
مرے دل میں اس آنگن کے پرندے
آنسوؤں کی ایک تسبیح روز پڑھتے ہیں
وہ پیاسے ہیں جبھی پنجوں کو اپنے گاڑے بیٹھے ہیں
مگر میں جانتی ہوں ایک دن ہم بھی وہاں ہوں گے
جہاں موجود بانہیں اکثر ہم کو ڈھانپ لیتی ہیں۔۔۔!

فرزانہ خان نیناؔں

ریت کے پیکر January 2, 2023

“ریت کے پیکر“

سرخ پھولوں کی یہ بیلیں
جنگلوں میں اُگ رہی تھیں
دشت کی ہیبت سے خائف
مجھ سے رہتی تھیں گریزاں
چودھویں کی رات میں
خوشبو سے جلتے ہوئے
کتنے جسموں کے ستونوں سے
لپٹنا تھا انہیں
میں نے ان کے رنگ سے
ہر انگ اپنا بھر لیا
دور تک پھیلے ہوئے
ریت کے ذرے سنہرے تھے بہت
تیز ہوا کے جھکڑوں کا شور
اونچا تھا مگر
میں نے اُس منظر میں
تم کو بھی تو دیکھا تھا وہاں
بال ہوا میں اڑ رہے تھے
سرخ پھولوں کی یہ بیلیں
باندھ لیں چپکے سے میں نے
اپنے صحرائی سفر میں
ان کی سوندھی خوشبوؤں کے
…!… پَر لگائے چل پڑی

*** #urdupoetry #farzananaina

عشق تماشہ January 2, 2023

صبح سویرے جاگی میں
سورج سے اک کرن اٹھا کر
اس سے اپنا منہ دھویا
سارے خوابوں کو بند کر کے
شب کے دریا میں پھینکا
پیڑوں پر گل رنگ پرندے
دل کی بولی بول پڑے
چلتی ہوئی منہ زور ہوائیں
اس لمحے جب مست ہوئیں
خوشہ خوشہ گل گلابی
سوندھی مٹی کی وہ کہانی
اپنے جَلو میں لے کر
میر کی غزلیں گانے لگیں
روح میں تتلی اڑانے لگیں
پھر تم کو اپنے باغ میں دیکھا
دھوکہ تھا وہ اُجلا دھوکہ
گھر کے شیشوں سے کرنوں کا رقص
اندھیرے کو بھاگا
بھول بھلیاں کی گلیوں میں
ایک تماشہ سا جاگا
عشق کی آتش بازی ایسی
تن من جس میں جل جل جائے
دیکھا بھی تو کیا دیکھا
دل میرا دشت میں اک ٹیلہ
وہ عشق تھا، ریت کا میں ذرہ
بس دور دور سے چمکیلا
میں نے آنکھوں کو مسلا
جھرمٹ آنسو کا اترا
کھڑکی کے شیشے ٹوٹے
دو نیناں رہ گئے بھیگے ہوئے ۔۔۔!

٭٭٭