Kab tum mujhko yaad karoge? September 23, 2018
Posted by Farzana Naina in Famous Urdu Poets, Farzana, Farzana Naina, Nazm, Poetry, Shairy, Urdu Poetry, Urdu Shairy.Tags: Farzana Naina, Kab tum mujhko yaad karoge, Kavita, Nazm, Poetry, Sad Poetry, Shairy, Urdu, Urdu Poetry
add a comment
Waqt ke uljhe uljhe dhaage
Jab dil tor kar chal deinge
Pag’dandi par peele pat’tey tumko tanha dekheinge
Perron ke seene par likhe naam bhi ho jayein tehleel
Aur hawa bhi simt ko apni kar jaye tabdeel
Bheeni bheeni khushbo humko har ik gaam pukare gi
Kar ke yakh’basta jab humko barf us paar sudhare gi
Dhoop sada’on ke sikke jab kanon mein khankae gi
Garja ghar ki oonchi burji chand ka chehra choome gi
Baarish, muskanon ke moti pat’ther par jab phorey gi
Aur barasti bondon ke dharon par dhaare jore gi
Garm garm angaaron jaise aansoo aankh se ubleinge
Dil ke armaan ik muddat ke baad tarap kar niklenge
Jab ehsaas ki dunya mein phir aur na ghungroo chan’kenge
Sirf khamoshi goonje gi tab aane wale mausam ki
Khirki par dastak na hogi kisi sureeli rim jhim ki
Shaam ke sanat’te mein badan par coat tumhara jhoole ga
Yaadon ka lams ta’tole ga ghor udaasi choo le ga
Oonchi oonchi baaton se tum khamoshi mein shor karogey
Geet purane sun kar thandi saansein bhar kar bhor karogey
Us pal shab ki tanhai mein apne dil ko shaad karogey
Bolo, mujhko yaad karoge…?